【二不容辭】
依家好多人都在家工作，甚至失去工作，無法想像喺香港另一端，有人仍然加班工作到想講粗口。
的士業界都知道，深夜放工班OT客係少咗好多，偶然就有一個半個拉開紅的車門，反正娛樂全無，要返工就有苦澀嘅閒錢，搭下的士幾好。
「仲要OT呀？去邊呢？」講真，我心𥚃係想講仲有得OT呀，只係唔想太串嘴。
「德福。係呀，痴線㗎，仲要OT呀。個八婆話公司其他team都work form home，一定要有人留守公司，仲要做到最後。」乘客滔滔不絕咁講OT都無用嘅理由，太多工種需要嘅係創作力，同時太多上司只見到勞力，於是資源錯配無限OT，大大力打空氣好好玩。
「冇辦法啦，而家又難轉工，如果唔係咪唔撈囉，使鬼驚啲八婆呢。」呢方面必須承認我自己有少少離地，換過講法係我從不迷戀comfort zone，職位同職員之間永遠應該係由職員去主導，咁先唔會被職位所捆綁。我自己由課室跳進車廂，再從文字圈跳進區議會，一路走來，從來就唔需要被仆街上司或制度所掣肘，想點就點。
「我都想轉工呀，留喺度又無用，本身諗住設計部可以話事，現實只係人哋枝畫筆，個構思點好都無用，老細一句就改晒。」喺乘客苦水中浸淫多年，佢講少少我都估到咩事：「咪人大釋法咁，一句講完，你幾有道理都好，幾多同事撐你都好，阿爺話點就點。咁你唔走？」
「走？走去邊丫，唔通揸的士咩，無人請咁點算。我哋二十幾人個個都三十五歲以上，個個都要供樓，我唔食細嘅都要食，只要有糧出，信念可以收一收先嘅。」緊繃嘅眉頭抒解開，始終有一份穩定工作，固定出糧，有得加班，已經比好多人幸運。有設計師唔做去揸的士？難。
「祝你好運啦，袋好張單啊。」
「係係，無咗張單就連的士錢都Claim唔到。」
揸的士，真係見好多乘客講份工點差點廢，搬理想出嚟嘅都不在少數，就係無幾多個肯裸辭迎接挑戰。總體都係兩大原因：一，無糧出、約滿酬金、錢。二，唔知去得邊、無信心。穩定就係香港人嘅信條，年中唔知框死咗幾多想像，扼殺咗唔少人嘅機會，白流咗好多鮮血同淚水，身邊人點支持佢哋辭職，大聲疾呼留任嘅弊病，總能夠搵到下台嘅藉口，永遠都係上述兩個原因。
起初義不容辭，終究二不容辭。
Search